Annar varamaður Framsóknar ekki í Framsókn

Ásrún Kristjánsdóttir hönnuður, sem skipaði 4. sæti á lista Framsóknarflokksins í seinustu borgarstjórnarkosningum, er ekki lengur í flokknum.

,,Ég er reiðbúin til starfa fyrir Reykvíkinga en ég er náttúrulega ekki í neinum flokki," segir Ásrún sem sagði sig úr Framsóknarflokknum meðal annars vegna samskiptaörðugleika við Björn Inga Hrafnsson, fyrrverandi oddvita flokksins.

Fram hefur komið að Marsibil Sæmundardóttir, varaborgarfulltrúi Framsóknarflokksins, styður ekki meirihlutasamstarfið við Sjálfstæðisflokkinn. Hún gerði Óskari Bergssyni, oddvita flokksins, grein fyrir þessu í gærdag, áður en hann gekk til viðræðna við sjálfstæðismenn. Staða mála virðist því svipuð og við myndun fráfarandi meirihluta. Þá studdi Magrét Sverrisdóttir, varaborgafulltrúi F-listans, ekki stamstarf Sjálfstæðisflokksins og Ólafs F. Magnússonar borgarstjóra.

,,Björn Ingi kom ekki vel fram en ég vildi gefa honum möguleika," segir Ásrún sem að lokum sagði sig úr flokknum. ,,Hann kom í veg fyrir að ég gæti unnið að mínum málum en ég er hönnuður og myndlistarmaður og hef starfað sem slíkur í meiri en fimmtán ár."

Ásrún segist hafa starfað í Framsóknarflokknum frá unga aldri og margsinnis skipað sæti á framboðslistum flokksins. ,,Ég fékk rosalega góða kosningu í prófkjörinu."

,,Ég var með ákveðin málefni sem ég vildi vinna að og Reykvíkingar treystu mér fyrir þeim. Ég stend við það út kjörtímabilið og ég er algjörlega reiðbúin til þess að taka að mér störf fyrir borgarbúa," segir Ásrún sem vill ekkert segja til um hvort hún gangi til liðs við Framsóknarflokkinn á nýjan leik.