Ólafur F: Óskar var áfjáður í samstarf með sjálfstæðismönnum

„Ég tel það verstu samsetningu á meirihluta í Reykjavík, samsetning Sjálfstæðisflokks og Framsóknar, og því íhugaði ég að segja af mér til að komast hjá því stórslysi. Óskar sýndi hins vegar engan áhuga á að vinna með Tjarnarkvartettnum, heldur var mjög ákveðinn og áfjáður í að vinna með sjálfstæðismönnum. " Þetta sagði Ólafur F. Magnússon, fráfarandi borgarstjóri í viðtali við Vísi í kvöld.

Ólafur segir að þess vegna hafi aldrei reynt á það að hann segði af sér sem borgarstjóri til þess að koma Tjarnkvartettnum að í borginni. Því séu ásakanir Óskars Bergssonar um klækjapólitík Samfylkingar og Vinstri grænna úr lausi lofti gripnar.

Fyrr í kvöld sagði Óskar við Vísi að fulltrúar úr Tjarnarkvartettnum hafi stillt honum upp við vegg og sagt að hann yrði að fullvísa Ólaf um að hann myndi ekki fara í viðræður við Sjálfstæðisflokk. Annars myndi Ólafur ekki segja af sér sem borgarstjóri, og þess vegna ekki hleypa Margréti Sverrisdóttur aftur að, svo Tjarnarkvartettinn gæti aftur tekið við stjórnataumunum í borginni.

Bakland Sjálfstæðisflokksins ákvað meirihlutaslitin fyrir nokkru

Ólafur fullyrðir að hann sjálfur hafi aldrei farið í neinar þreifingar um nýjan meirihluta. Hann hafi alltaf viljað halda samstarfi áfram við Sjálfstæðisflokkinn en það hafi endað þegar Hanna Birna tjáði honum það símleiðis í gærdag.

Hann telur hins vegar að löngu áður en það kom fram í fjölmiðlum hafi bakland Sjálfstæðisflokksins ákveðið að slíta samstarfinu og fá Framsókn til liðs við sig. Þeirri ákvörðun hafi borgarfulltrúar Sjálfstæðisflokksins einfaldlega þurft að hlíta.

„Og það finnst mér afleitt. Því við, sem kjörnir fulltrúar, erum með umboð frá kjósendum í Reykjavík en ekki flokkum," segir Ólafur.