Kjartan: Vonbrigði að samstarfið við Ólaf hafi ekki gengið

Kjartan Magnússon borgarfulltrúi Sjálfstæðisflokksins segir það ákveðin vonbrigði að ekki hefði verið hægt að halda samstarfinu við Ólaf F Magnússon áfram. Ólafur sagði í yfirlýsingu fyrr í dag að hann hefði verið blekktur til samstarfs við Sjálfstæðisflokkinn. Kjartan segir það ekki rétt.

„Þegar menn fóru af stað í janúar var ekki verið að blekkja einn né neinn til samstarfs. Það voru full heilindi að baki þeirri myndun," segir Kjartan sem hafði ásamt Vilhjálmi Þ. Vilhjálmssyni frumkvæðið að myndun meirihlutans með Ólafi F.

Kjartan ítrekar að full heilindi hafi verið þar að baki en segir að eins og komið hafi fram í fjölmiðlum hafi það samstarf ekki gengið. Kjartan vill þó ekki fara nánar út í hvaða málefni það voru nákvæmlega sem ágreiningur var um. Hann segir þetta niðurstöðuna.

Aðspurður hvort samstarfið við Ólafi hafi valdið vonbrigðum segir Kjartan: „Það eru ákveðin vonbrigði að við skyldum ekki hafa getað haldið því áfram."