Borgarráð samþykkir að hafna samruna REI og GGE

Samþykkt var einróma á fundi borgarráðs í morgun að hafna samruna Reykjavík Energy Invest, útrásararmi Orkuveitunnar, og Geysis Green Energy. Það var Svandís Svavarsdóttir, formaður stýrihóps sem skoðað hefur REI-málið, sem lagði tillöguna fram.

Jafnframt var samþykkt að fallast ekki á 20 ára þjónustusamning Orkuveitunnar og REI sem gerði meðal annars ráð fyrir að REI fengi aðgang að tækniþekkingu OR og forgang á verkefni OR erlendis.

Var stjórn Orkuveitunnar falið að ljúka málinu af hálfu borgarinnar. Þá var samþykkt að fela innri endurskoðun borgarinnar að gera stjórnsýsluúttekt á Orkuveitu Reykjavíkur en gert er ráð fyrir að stýrihópur borgarinnar í málinu starfi áfram. Reykjavik Energy Invest mun auk þess starfa áfram að útrás.

Málsmeðferðin verulegt áfall fyrir stjórnsýslu borgarinnar

Fram kemur í greinargerð með tillögunni að stýrihópurinn hafi frá 18. október farið yfir fjölmargar hliðar samrunans og kallað á sinn fund marga málsaðila, þar á meðal Bjarna Ármannsson, stjórnarformann Reykjavik Energy Invest, Hjörleif Kvaran, starfandi forstjóra Orkuveitunnar, Guðmund Þóroddsson, forstjóra Reykjavik Energy Invest, borgarlögmann og Helga Jóhannesson lögmann sem stýrði fundi Orkuveitunnar þar sem samrunninn var samþykktur.

Stýrihópurinn hefur komist að þeirri niðurstöðu að málsmeðferð og ákvarðanataka í samningaferli um sameiningu Reykjavik Energy Invest og Geysir Green Energy kunni að orka verulega tvímælis og sé ekki hafin yfir vafa. Málsmeðferðin er því verulegt áfall fyrir stjórnsýslu Reykjavíkurborgar segir í greinargerðinni.

Engar haldbærar skýringar eða rök hafi komið fram sem réttlæta þann hraða sem viðhafður var í málinu og leiddi til þess að reglur um boðun eigendafunda hafi verið brotnar og að stjórnarmenn OR og fulltrúar eigenda fengu takmörkuð tækifæri til að skoða og yfirfara gögn í málinu og byggja sína ákvörðun þannig á fullnægjandi forsendum. Slíkt hljóti að teljast afar alvarlegt þegar um er að ræða svo yfirgripsmikla ákvörðun sem hér er til umfjöllunar.

Málefni REI komust í hámæli upphafi síðasta mánaðar, meðal annars vegna samrunans við GGE og kaupréttarsamninga til valinna starfsmanna REI og Orkuveitunnar. Leiddi málið á endanum til falls meirihluta sjálfstæðismanna og framsóknarmanna í borginni og nýr meirihluti tók við sem farið hefur ofan í saumana á málinu.