Vonar að ákvörðun borgarráðs hægi ekki á orkuútrás

Össur Skarphéðinsson iðnaðarráðherra segist vona að sú ákvörðun borgarráðs að hafna samruna Reykjavik Energy Invest og Geysis Green Energy verði ekki til þess að hægja á útrás íslenskra fyrirtækja í orkumálum. Hann segir þetta mál borgarstjórnar en hann eigi ekki von á ákvörðunin dragi úr útrásinni.

„Ég tel að næstu tvö til fjögur ár séu afar mikilvæg fyrir framgang útrásarinnar því það eru fleiri en Íslendingar sem vilja hasla sér völl á þessu sviði," segir Össur. Hann hafi til að mynda í ferð sinni til Indóensíu á dögunum orðið var við hversu mikinn áhuga Chevron, sem er bandarísk olíufyrirtæki, hafi á jarðhitaverkefnum þar líkt og Íslendingar.

„Ég hef sannfærst um það eftir ferð mína til Indónesíu að tækifærin sem Íslendingar eiga á svið jarðorkuvinnslu séu enn meiri en ég hélt áður. Ég hef alltaf verið þeirrar skoðunar að útrásarfyrirtækin í þessum geira ættu að sameinast eða vinna saman," segir Össur og segir að jafnvel ætti að íhuga hvort fyrirtæki á sviði vatnsafls ættu einnig að koma að þeirri samvinnu. „Því fjársterkari sem félögin eru og því meiri þekkingu sem þau búa yfir þeim mun meiri möguleika eiga þau á þessu sviði á alþjóðavettvangi," segir Össur.