Stjórnsýsluúttektin verði unnin fljótt og vel

„Við lítum á þetta sem fyrsta skrefið í ferlinu en málinu er ekki lokið," segir Gísli Marteinn Baldursson um ákvörðum borgarráðs sem í dag ákvað að hafna samruna Reykjavík Energy Invest og Geysi Green Energy. „Það reið á að borgin sýndi það í verki að henni líkaði ekki við það hvernig að þessum málum var staðið. Það er lykilatriði í þessu máli öllu að vilji borgarráðs og borgarstjórnar lá aldrei fyrir í málinu."

Gísli segir að þessi ákvörðun sé fyrsta skrefið í málinu og að samstaða hafi verið á meðal fulltrúa flokkana að stíga það. Í framhaldi af þessari ákvörðun verður gerð stjórnsýsluúttekt á Orkuveitu Reykjavíkur. „Það þarf að gera úttekt á því hvort lög hafi verið brotin í þessu máli, en það bendir ýmislegt til þess," segir Gísli og bætir því við að mikið ríði á að sú úttekt verði unnin fljótt og vel.

„Það má kannski segja það," segir Gísli aðspurður hvort þessi leið sé betri en upphaflega hugmynd sjálfstæðismanna, sem vildu selja eignarhluta Orkuveitunnar í REI sem fyrst. „Það náðist samkomulag um að fara þessa leið og við í Sjálfstæðisflokknum erum sátt við það."

Að sögn Gísla Marteins hefur ekki verið rætt um hvort þessi ákvörðun borgarráðs geti gert borgina skaðabótaskylda í málinu. „Það er hugsanlegt að slíkt gæti komið til en það veltur ekki síst á því á því hvað kemur í staðinn," segir Gísli og bætir við að fyrst og fremst hafi verið samstaða um að eyða þeirri óvissu sem upp hefði verið komin í málinu öllu.

Hann segir líka mikilvægt að vandræði borgarinnar í málinu bitni ekki meira en orðið er á þeim einkaaðilum sem hlut eiga að máli. „Það er okkar megin sem vinnubrögðuin voru ekki í lagi og það er ótækt að láta það bitna á samstarfsaðilunum."