Fórnarlömb bera kostnaðinn

Þrír piltar á aldrinum fimmtán til sautján ára játuðu á miðvikudagskvöld að hafa unnið skemmdir á fjórða tug bifreiða, á vinnuvélum og hesthúsum í Hafnarfirði nóttina áður. Þá brutu þeir rúður í heimahúsum. Þeir voru látnir lausir eftir yfirheyrslur.

Að sögn Geir Jóns Þórissonar, yfirlögregluþjóns hjá lögreglu höfuðborgarsvæðisins, er hægt að sækja piltana til saka fyrir brot sín. Þeir hafa allir náð sakhæfisaldri. Ekki sé þó hægt að krefja þá um greiðslu fyrir skemmdirnar. „Það verða örugglega gerðar bótakröfur en þeir eru ekki fjárráða. Og það er heldur ekki hægt að ganga á foreldrana. En það getur vel verið að þeir grípi til þess að bæta tjónið. Ég get ekkert fullyrt um það.“ Geir Jón segir lögregluna áður hafa þurft að hafa afskipti af piltunum vegna mála af þessu tagi.

Pétur Már Jónsson, forstöðumaður tjónaþjónustu VÍS, segir eigendur og tryggingarfélög sitja uppi með kostnað vegna skemmdarverkanna. „Ef þetta eru rúðubrot þá nær bílrúðutrygging yfir það. Hún greiðir tjónið af rúðum utan við tíu prósenta sjálfsábyrgð. Ef skrokkur á bifreið er skemmdur til viðbótar og er ekki í kaskó, situr eigandi uppi með tjónið ef ekki er hægt að fá fébætur frá gerenda. Ef viðkomandi bifreið eða vinnuvél er með kaskó- eða vinnuvélatryggingu þá ná þær hins vegar yfir skemmdirnar.“