Olíufélög í hár saman

Fyrirtækin Atlantsolía og Olís eru komin í hár saman eftir að það síðastnefnda lét draga auglýsingabifreið Atlantsolíu í burtu. Framkvæmdastjóri Atlantsolíu krefst þess að Olís skili bílnum og greiði öll gjöld vegna þessa.

Forsaga málsins er sú að föstudaginn komu starfsmenn Atlantsolíu fyrir auglýsingabifreið á bílastæði við Skúlagötu en stæðið liggur við hliðiná bensínstöð Olís. Þegar starfsmennirnir komu til baka daginn eftir var bíllinn hins vegar á bak og burt. Við nánari eftirgrennslan fengust þau skilaboð að Vaka hefði fjarlægt bílinn að beiðni Olís. Vísuðu Olísmenn til þess að stæðið sé þeirra eign.

Þessa skýringu vill Albert Þór Magnússon, framkvæmdastjóri Atlantsolíu, ekki sætta sig við og telur að bifreiðin hafi verið fjarlægð án fyrirvara og með ólöglegum hætti í skjóli nætur. Þá telur hann ekki sannað að lóðin tilheyri Olís. Í gær mætti hann í höfuðstöðvar Vöku og krafðist þess að bílnum yrði skilað og reikningurinn sendur Olís.

Af símasamtali Alberts við starfsmann Olís að dæma var hins vegar ljóst að þeir ætluðu ekki að bakka í málinu.

Albert segir ljóst að fari svo að bílnum verði ekki skilað muni hann setja lögfræðinga í málið.

Í samtali við fréttastofu sagði Jón Halldórsson, framkvæmdastjóri sölusviðs Olís, það ekki koma til greina að láta undan kröfum Atlantsolíu. Sagði hann félagið í fullum rétti að láta fjarlægja bifreiðina þar sem lóðin sé án nokkurs vafa eign Olís