Ýjar að því að REI-mál hafi verið pöntuð árás á Vilhjálm

Össur Skarphéðinsson, iðnaðarráðherra í ríkisstjórn Samfylkingarinnar og Sjálfstæðisflokksins gerir stólpagrín að Sjálfstæðismönnum í pistli á heimasíðu sinni í nótt. Hann ýjar að því að „hamfarahlaupið gegn REI", eins og ráðherrann orðar það, hafi verið pöntuð árás gegn Vilhjálmi Þ. Vilhjálmssyni, fyrrverandi borgarstjóra.

Pistilinn skrifar Össur í nótt undir titlinum „Ef væri ég Þorgerður sæi Orkuveita Reykjavíkur um Skaupið". Eins og kunnugt er hefur Landsvirkjun tilkynnt um stofnun hlutafélagsins Landsvirkjunar Power til að draga úr áhættu fyrirtækisins af útrásarerkefnum. Hlutafélagið á alfarið að vera í eigu Landsvirkjunar.

Fyrr á árinu stofnaði Landsvirkjun hins vegar útrásarfyrirtækið Hydrokraft ásamt einkafyrirtækinu Landsbankanum og var því vel tekið í ríkisstjórn. Varla hefur nokkrum liðið úr minni að borgarstjórnarmeirihlutinn sprakk nú í haust vegna samvinnu einkafyrirtækja og REI.

Össur segist í pistlinum hafa „glott við fót" við fréttir af því að „Landsvirkjun hyggðist nú feta í útrásarspor REI". Hann leggur út af myndbandi sem sýnt var á árshátíð Orkuveitunnar nú í haust og veltir því fyrir sér hví Björn Ingi Hrafnsson, sem sprengdi meirihlutann í borginni, sé svona „skælbrosandi" á myndbandinu. Og skrifar síðan:

„Varla hefur hann séð glitta í ósamræmi á milli orða og gjörða Sjálfstæðismanna eftir því hvort þeir eru í borgarstjórn eða landsstjórninni." Össur heldur áfram og vitnar í „BíBí frænda" - en þar á hann væntalega við Björn Bjarnason dómsmálaráðherra, sem með orðum Össurar segir að „þar sé allt í stakasta lagi og allir vinir í þeim skógi."

Þá skrifar Össur að "Ef einhver ræfill af samkvæmni er eftir í Styrmi ritstjóra (Morgunblaðsins) á hann engan kost annan en vaða með vélsögina gegn trjánum, sem Friðrik skáti og forstjóri Landsvirkjunar er nú að plánta í nýjan útrásarskóg. Ef hann gerir það ekki, þá er um leið staðfest að mótívasjón hans í hamfarahlaupinu gegn REI var pöntuð árás gegn Vilhjálmi þáverandi Borgarstjóra.

Pöntunarfélagið þekkja allir - það eru þeir Davíð, hann sjálfur, Kjartan Gunnarsson og enn einn sem ég þori ekki að nefna til að verða ekki sakaður um að vera rétt einn ganginn að skapa úlfúð innan hinnar friðsönu stórfjölskyldu við ríkisstjórnarborðið í tugthúsinu gamla, sem í daglegu tali gengur undir nafninu Stjórnarráð Íslendinga," segir Össur enn fremur á heimasíðu sinni.