Bjarni baðst afsökunar í ræðustól Alþingis

Bjarni Harðarson, þingmaður Framsóknarflokksins, segir að hann hafi mismælt sig þegar hann sagði að sér hefði verið sagt að Árni Sigfússon ætti persónulega hluti í Þróunarfélagi Keflavíkurflugvallar og í Keili.

„Ég var þarna að lesa af blaði og ég gerði mér enga grein fyrir því að þetta hefði komið svona út," segir Bjarni í samtali við Vísi. Það var Árni Johnsen, kollegi Bjarna og frændi Árna bæjarstjóra sem benti þingmanninum á að hann hefði þarna farið með fleipur.

„Ég fór þá í ræðustól í umræðunni um fjáraukalögin og leiðrétti þessa vitleysu. Þar bað ég þá báða afsökunar á mistökunum en það er leiðinlegt að þetta hafi farið svona út," segir Bjarni.