Dæmdur fyrir kannabisrækt og innbrot

Karlmaður var dæmdur í Héraðsdómi Norðurlands eystra í dag fyrir að hafa ræktað kannabis á heimili sínu á Akureyri um tveggja mánaða skeið.

Við húsleit, sem gerð var á heimili mannsins í ágúst 2006, fannst einnig hassolía, niðursaxaðir kannabisstönglar og kannabisfræ. Maðurinn var einnig ákærður fyrir að brjótast inn í veitingastað á Akureyri í mars 2007 í því skyni að stela áfengi af staðnum.

Í dómnum kemur fram að ákærði eigi að baki nokkurn sakaferil. Hann var síðast dæmdur í sjö mánaða skilorðsbundið fangelsi þann 8. maí 1998. Þá var hann dæmdur í 45 daga skilorðsbundið fangelsi þann 16. nóvember 2001.