Bryndís verður stjórnarformaður OR tímabundið

Bryndís Hlöðversdóttir, fyrrverandi þingmaður og núverandi aðstoðarrektor á Bifröst, verður stjórnarformaður Orkuveitu Reykjavíkur á meðan pólitískir fulltrúar í borginni fara yfir málefni fyrirtækisins í heild sinni. Þetta kemur fram í tilkynningu frá nýjum meirihluta.

Þar segir að fyrsta verk meirihlutans verði að vinna að heildarstefnumörkun í málefnum Orkuveitu Reykjavíkur og verður á fundi borgarráðs á fimmtudaginn skipaður þverpólitískur stýrihópur undir forystu Svandísar Svavarsdóttur til þess að takast á við verkefnið. Til verkefnisins verða kallaðir óháðir sérfræðingar til að leggja mat á mismunandi leiðir í núverandi stöðu og draga lærdóm af umræðu og gögnum málsins. Hópurinn mun einnig leggja grunn að ákvörðunum um næstu skref í málefnum Orkuveitunnar, hlut hennar í útrás á orkusviði og stefnu til framtíðar. Gert er ráð fyrir samráði við við aðra eigendur í Orkuveitunni.

Í ljósi þess að pólitískir fulltrúar munu fara yfir mál Orkuveitunnar hefur verið ákveðið draga slíka fulltrúa úr stjórninni á meðan á skoðuninni stendur og tilnefna þess í stað trúnaðarmenn flokkana. Fulltrúi Samfylkingarinnar og stjórnarformaður verður Bryndís Hlöðversdóttir, aðstoðarrektor Háskólans á Bifröst, fulltrúi Vinstri grænna verður Ástráður Haraldsson hæstaréttarlögmaður og fyrir Framsóknarflokkinn tekur Jón Sigurðsson, fyrrverandi formaður Framsóknarflokksins, en hann verður jafnframt varaformaður stjórnar.

Í stýrihópnum um heildarstefnumörkun um stöðu og hlutverk Orkuveitu Reykjavíkur er gert ráð fyrir að oddvitar allra flokka sem sæti eiga í borgarstjórn Reykjavíkur sitji auk Sigrúnar Elsu Smáradóttur borgarfulltrúa sem mun taka við stjórnarformennsku í fyrirtækinu að endurskoðun lokinni.