Tendrun friðarsúlu Yoko Ono vekur heimsathygli

Það er langur listi fyrirmenna sem fengið hefur boð um að vera við tendrun á friðarsúlu Yoko Ono í Viðey á fæðingardegi bítilsins John Lennon. Nærri öruggt þykir að Ringo Starr muni baða sig í sviðsljósinu með ekkjunum Yoko Ono og Oliviu Harrison. Ingólfur Margeirsson bítlasérfræðingur vonar að Paul McCartney mæti á svæðið.

Yoko Ono og Ringo Starr voru saman í Abbey Road hljóðverinu þegar Bítlarnir tóku upp nokkrar af helstu perlum sínum.

Þau munu því hittast á ný í Viðey þegar friðarsúlan verður tendruð en hún mun loga í minningu John Lennon, annars af mestu poppskáldum sögunnar. Ekkja gítarleikarans George Harrison verður einnig í för með þeim.

Rithöfundurinn Ingólfur Margeirsson, einn helsti Bítlasérfræðingur landsins, sem landsfrægur er fyrir Bítlaþættina sína á Rás 2, vonar að Paul McCartney mæti til landsins. Ingólfur er á því að framlag Paul og annarra Bítla hafi verið meira en eitthvað gítargutl.

Ingólfur segir að Bítlarnir séu einstakir í tónlistarsögunni og að þeir hafi fléttað saman ólíkum straumum og stefnum og fært fólkinu.

Mjög er á reiki hverjir hafa þekkst boð Yoko um að mæta við tendrun friðarsúlunnar en samkvæmt heimildum fréttastofu hefur George Martin upptökustjóri Bítlanna fengið boð og sömuleiðis synir Lennon, þeir Julian og Sean. Þetta hefur þó ekki verið staðfest en það hefur hins vegar verið staðfest að bítlatrymbillinn geðþekki Ringo Starr ætli að koma.

Ef allt fer á besta veg mun Ringo lemja húðir með Stuðmönnum eins og hann gerði um árið þegar hann spilaði í Atlavík. Þá verður að líkindum ansi Bítlalegt í Reykjavík í næstu viku og ekki alveg fráleitt að nýtt Bítlaæði bresti á.