"Kennarar eins og útspýtt hundskinn á eftir leikstjórum"

"Kennarar okkar hafa verið eins og útspýtt hundskinn á eftir leikstjórum og rétthöfum til að fá leyfi til sýninga á myndum þeirra í náminu," segir Ragnhildur Richter deilarstjóri í íslensku við MH. Þrátt fyrir að kennsla um íslenskar kvikmyndir og kvikmyndagerð hafi staðið framhaldsskólanemum til boða um nokkurt skeið hefur menntamálaráðuneytið enn ekki samið um greiðslur fyrir slíkt við rétthafa utan tvo.

Undantekiningar eru að samið hefur verið við þá Hrafn Gunnlaugsson og Friðrik Þór Friðriksson. Steingrímur Sigurgeirsson aðstoðarmaður menntamálaráðherra segir að það sé á ábyrgð viðkomandi skóla að höfundarréttur á myndum sem notaðar eru við kennsluna sé virtur og fyrir hann greitt. "Við höfum ekki viljað blanda okkur í hvaða námsefni hver skóli velur," segir Steingrímur en viðurkennir aðspurður að æskilegast sé að samið sé um málið við alla á einu bretti.

Ragnhildur Richter segir að þau hafi skrifað menntamálaráðuneytinu formlegt bréf um málið fyrir tveimur árum síðan. Ráðuneytið hafi þá svarað að ekki væri gert ráð fyrir fjárveitingu til þessa málaflokks. "Kvikmyndagerðarmenn hafa hinsvegar verið ótrúlega jákvæðir þegar við höfum leitað til þeirra með óskir um að nota myndir í kennslunni hjá okkur," segir Ragnhildur.

Íslensk kvikmyndagerð og kvikmyndir er valáfangi við MH. Ragnhildur segir hinsvegar að þau vilji nota kvikmyndir m.a. við bókmenntakennslu í skólanum enda búið að kvikmynda mörg þekkt bókmennaverk. "Og kvikmyndir eru það stór hluti af menningu okkar nú til dags að nauðsynlegt er að nemendur okkar fái fræðslu um þær," segir hún.