Bráðnandi jöklar gætu leyst hættulegar örveirur úr læðingi

Í Ekstra Bladet í dag er umfjöllun um þær hugsanlegu afleiðingar bráðnandi og hopandi jökla að slíkt muni leysa úr læðingi hættulegar örveirur og bakteríur eins og Spænsku veikina eða Svarta dauða. Sigurður B. Þorsteinsson yfirlæknir og formaður Sóttvarnaráðs segir að vissulega sé þessi fræðilegi möguleiki til staðar en benda verði á að engin dæmi séu um að þetta hafi raunverulega gerst.

Í grein Ekstra Bladet undir fyrirsögninni "Dauðinn lúrir í ísnum" er vitnað til samtals sem sænska sjónvarpsstöðin TV4 átti við jöklafræðinginn Andy Hodson. "Það eru árþúsunda gamlar örveirur, sem vaxa hægt í ísnum og þegar ísinn bráðnar lifna þær við á ný," segir Hodson m.a. og bendir á að hættan sé einkum fólgin í að ónæmiskerfi mannsins eigi ekkert svar við þeim.

Johan Giesecke yfirmaður sóttvarnaráðs Evrópubandalagsins segir að dæmi um óttastöðu sé til dæmis að spænska veikin blossi upp á ný og fólk smitist af henni eins og fyrir 100 árum. Hann segir hættuna á þessu þó óverulega.

Sigurður B. Þorsteinsson bendir á í þessu sambandi að fyrir nokkrum árum hafi verið gerður út leiðangur til Svalbarða til að grafa upp lík fólks sem hafði dáið þar af spænsku veikinni. "Það fannst hinsvegar engin slík veira í þessum líkum," segir hann. Ætlunin var að nota veiruna ef hún fyndist til að mynda bóluefni gegn henni.

Og Kaare Mölbak yfirlæknir við Statens Seruminstitut í Kaupmannahöfn er á sama máli og Giesecke hvað varðar hættuna af jöklabráðnuninni. Hann segir að sín fyrstu viðbrögð við þessum fregnum séu að þetta sé eitthvað sem kvikmyndaiðnaðurinn geti nýtt sér..."Þið ættuð að hringja til Ole Bornedal," segir hann við blaðamann Ekstra Bladet.