Nýjustu Potter bókinni lekið?

Svo virðist sem ,,Harry Potter and the Deathly Hallows", nýjustu bókinni um galdradrenginn vinsæla hafi verið lekið á netið. Myndir af því sem virtust vera hver einasta síða bókarinnar birtust á ýmsum skráarskiptasíðum á netinu í gær.

Á myndunum liggur bókin á græn- og rauðmunstruðu teppi og er hver opna mynduð fyrir sig. Sumstaðar eru stafir óskýrir, en þó er endirinn auðlesanlegur.

Miklar vangaveltur hafa verið um endinn, og örlög galdradrengsins, en höfundur bókanna, JK Rowlings, hefur gefið í skyn að tvær eða fleiri af aðalpersónum bókarinnar láti lífið.

Bókin, sem beðið hefur verið með mikilli eftirvæntingu um heim allan, kemur opinberlega fyrst út á Íslandi klukkan eina mínútu yfir ellefu föstudagskvöldið næstkomandi.

Talsmaður Scholastic, útgáfufyrirtækis bókanna í Bandaríkjunum, sagðist vita af minnst þremur útgáfum af skránum og staðfesti að myndirnar væru ,,mjög sannfærandi". Fyrirtækið stefndi Gaia Interactive, sem rekur síðuna Gaiaonline.com, og krafðist þess að fyrirtæki léti af hendi upplýsingar um notanda síðunnar sem setti myndirnar upp á heimasvæði sínu. Gaia varð við því og fjarlægði myndirnar af síðunni.

Útgefendur bókarinnar í Bretlandi vöruðu þó við því að falsarar væru mjög færir, og ekki væri víst að myndirnar væru ekta.

Mikið húllumhæ verður vegna útgáfunnar á föstudagskvöldið og búa bókabúðir sig nú undir mikla örtröð.