Þingmenn ánægðir með stofnun þróunarfélags

Þingmenn stjórnar og stjórnarandstöðu virðast sammála um að það hafi verið gott skref að stofna þróunarfélag um framtíð byggðarinnar á Miðnesheiði. Björgvin G Sigurðsson þingmaður Samfylkingarinnar spurði í fyrirspurnatíma á Alþingi í dag hvort fram hefði farið úttekt um nýtingu á svæðinu.

Í svari Valgerðar Sverrisdóttur utanríkisráðherra kom fram að svo væri ekki en að hún hefði fulla trú á starfi þróunarfélagsins sem hefði verið falið að halda utan um málið. Björgvin sagði svo að það hefði verið áhugavert að heyra framtíðarsýn ráðherra um svæðið. Því svaraði Valgerður að hún legði áherslu á starf tengt flugvellinum og að starfið á Miðnesheiðinni mundi að miklu leyti snúast um hann.