Vilja setja Hiddink í fangelsi

Hollenskur saksóknari vill láta stinga knattspyrnuþjálfaranum Guus Hiddink í fangelsi vegna skattsvika og segir hann hafa vikið sér undan stórum fjárhæðum á árunum 2002 og 2003 þar sem hann hafi logið því að hann væri belgískur ríkisborgari. Hiddink er núverandi landsliðsþjálfari Rússa en hefur m.a. verið orðaður við Chelsea.

Hiddink og lögmaður hans hafa neitað að tjá sig um þessar stríðsyfirlýsingar hollenska saksóknarans og þá hefur formaður rússneska knattspyrnusambandsins lýst því yfir að hann hafi ekki of miklar áhyggjur af málinu.

"Ég tel nú að menn fari ekki í fangelsi fyrir svona lagað, nema kannski á miðöldum og ég á ekki von á því að farið verði út í svona öfgar í evrópskum dómstólum. Þar fyrir utan er það dómara að úrskurða í svona málum en ekki saksóknarans," sagði Vitaly Mutko, formaður rússneska knattspyrnusambandsins.

Hiddink hefur náð frábærum árangri á ferlinum þar sem hann hefur stýrt liðum eins og PSV, Real Madrid, Valencia og unnið bæði deildir og Evrópukeppni. Þá hefur hann þjálfað landslið Hollendinga, Ástrala og Suður-Kóreu með glæstum árangri og er líklega einhver þekktasti og árangursríkasti málaliðinn í knattspyrnuheiminum í dag.