Gremja í berbúðum Galaxy vegna launa Beckhams

Miðjumaðurinn Peter Vagenas hjá knattspyrnuliðinu LA Galaxy, viðurkennir að nokkur gremja sé í leikmönnum liðsins vegna þeirra ofurlauna sem David Beckham muni raka inn þegar hann gengur í raðir liðsins í sumar.

Beckham er sagður muni raka inn yfir 250 milljónir dollara fyrir samning sinn við félagið, en þó aðeins brot af því komi frá félaginu í formi sjálfs leikmannasamningsins - segist Vagenas ekki geta neitað því að það sé út í hött.

"Vitur maður sagði eitt sinn að þú værir virði samningsins sem þú nærð þér í og hann er auðvitað sjálfur David Beckham. Ég væri samt að ljúga ef ég segði að það væri ekki smá gremja í mannskapnum. Beckham má alveg fá þessa peninga ef hann getur náð í þá og njóti hann vel - en partur af manni hugsar alltaf, "af hverju get ég ekki fengið eitthvað af þessum peningum," sagði Vagenas, sem sjálfur er einn besti leikmaður Galaxy og vinnur sér inn um það bil 63.000 dollara á ári.