Dómarinn er fífl

Dómarinn sem dæmdi gilt markið sem Maradona skoraði með höndinni gegn Englendingum í heimsmeistarakeppninni í Mexíkó árið 1986, er fífl. Þetta segir annar línuvörðurinn í leiknum.

Aðeins örfáum mínútum eftir markið umdeilda skoraði Maradona annað mark sem margir telja vera fallegasta mark sem sést hefur á knattspyrnuvellinum. Argentínumenn unnu leikinn 2-1, slógu Englendinga út úr keppninni, komust í undanúrslit og urðu heimsmeistarar. Eftir leikinn sagði Maradona eins og frægt er orðið að hann hefði skorað örlítið með höfðinu og örlítið með hönd guðs.

Búlgarski línuvörðurinn sem stóð vaktina í umræddum leik, Bogdan Dotchev, tjáði sig í fyrsta sinn opinberlega um atvikið í blaðaviðtali í gær. Hann segist hafa séð það strax að Maradona notaði höndina til að skora markið. Hann sagði hins vegar að það hefði ekki verið á sínu valdi að ógilda markið. Reglurnar hefðu verið öðruvísi þá.

Ali Bin Nasser frá Túnis dæmdi leikinn og flautaði strax til merkis um að markið væri gilt.

"Evrópskur dómari hefði aldrei dæmt þetta mark gilt. Evrópskir dómarar dæma a.m.k. einn til tvo stórleiki á mánuði og eru vanir slíkri pressu. Dómarinn er fífl sem á helst heima í eyðimörkinni sem kamelhirðir." sagði línuvörðurinn fyrrverandi í viðtali við breska dagblaðið The Sun.

Yfirmaður dómaramála á Englandi, Keith Hackett gat hins vegar ekki tekið undir þessi orð Dotchevs. Hann segir að ekkert hefði átt að geta komið í veg fyrir að línuvörðurinn flaggaði til merkis um að dæma markið ógilt. Þetta atvik hefði bara verið eitt af þeim sem lýstu vanhæfni dómaratríósins.