Blatter vill ekki lýsa yfir fullum stuðningi við Platini

Sepp Blatter, forseti Alþjóða Knattspyrnusambandsins, segir knattspyrnugoðið Michel Platini eiga erfitt verkefni fyrir höndum í lok mánaðarins þegar forsetakosningar fara fram hjá Knattspyrnusambandi Evrópu. Platini býður sig þar fram gegn sitjandi forseta, Svíanum Lennart Johansson, en sá hefur verið í valdastól síðan árið 1990.

Blatter er sjálfur ekkert unglamb, en hann hefur lýst því yfir að þó hann styðji Johansson, sé hann orðinn heldur gamall til að sinna embættinu - 77 ára. 52 nefndarmenn munu kjósa forseta þann 26. janúar nk. og þar kemur í ljós hvort það verður Platini eða Johansson sem hreppir hnossið - en þeir eru einu frambjóðendurnir.

"Ef ég er beðinn að gera upp á milli knattspyrnumanns og sitjandi stjórnarmanns, skulum við bara segja að knattspyrnumaðurinn eigi alla mína samúð," sagði Blatter og vildi ekki útskýra afstöðu sína frekar. Platini vann sem ráðgjafi Blatter á árunum 1998-2002 og hefur starfað bæði hjá FIFA og UEFA síðan.

Mikil óvissa ríkir um það hvor frambjóðandinn er sigurstranglegri í kjörinu, en Platini sagði sjálfur að hann yrði að tala mjög varlega næstu daga, því hann spáði því að minnst 20 menn í nefndinni væru enn óákveðnir.