Kópavogsbær véfengir ekki niðurstöðu matsmanna

Kópavogsbær véfengir ekki niðurstöðu matsmanna í skýrslu um það hversu mörg tré hafi verið fjarlægð og spillst vegna framkvæmda Kópavogsbæjar við vatnslögn í Heiðmörk. Samkvæmt skýrslunni voru 559 tré af fimm tegundum felld í framkvæmdunum en 57 þeirra var skilað.

Kópavogsbær og Skógræktarfélag Reykjavíkur höfðu deilt um þann fjölda trjáa sem fjarlægð voru í framkvæmdunum. Hélt Kópavogsbær því fram fyrr á árinu að þau væru um 90 og byggðist sú tala á skýrslu verktaka. Skógræktarfélagið taldi hins vegar að þau væru um þúsund. Skýrsla matsmanna leiðir hins vegar í ljós að 559 tré voru fjarlægð og 57 skilað aftur.

Að sögn Helga Gíslasonar, framkvæmdastjóra Skógræktarfélags Reykjavíkur, er ekki tekið tillit til náttúrulegra birkitrjáa í skýrslunni en ef þau hefðu verið talin með væri fjöldi trjánna 800-900. Hann segir enga ákvörðun hafa verið tekna um framhaldið en býst við að funda með forsvarsmönnum Kópavogsbæjar um málið.

Skógræktarfélagið sendi Kópavogsbæ kröfu í vor upp á 38 milljónir króna vegna tjónsins og segir Helgi að stjórn félagsins hafi enga ákvörðun tekið um aðra bótakröfu í ljósi skýrslunnar. Stjórnin komi þó saman í september þar sem þetta mál verði rætt. Hann segir skarðið í Heiðmörk ansi mikið vegna framkvæmdanna og að áratugavinna hafi að hluta til farið forgörðum.

Þór Jónsson, forstöðumaður almannatengsla hjá Kópavogsbæ, segir bæinn ekki véfengja niðurstöðu matsmanna og að það sé 502 trjám færra í Heiðmörk en þegar framkvæmdir við vatnslögnina hófust.

Aðspurður um framhalds málsins segir Þór að Kópavogsbær hafi þegar sett sig í samband við Reykjavíkurborg og spurst fyrir um það, vegna óvissu um eignarhald á trjánum, hver sé afstaða Reykjavíkurborgar, hvort borgin telji að umrædd tré séu í sinni eigu, Skógræktarfélagsins eða einhvers annars. Kópavogsbær sé ekki að skorast undan ábyrgð heldur að fá úr því skorið hvaða forsendur liggi til grundvallar.