Stálu fermingjargjöfum eftir að hafa hreiðrað um sig í einbýlishúsi

Fíkniefnaneytendur hafa einhverja síðustu daga brotist inn í einbýlishús í Garðabæ þar sem þeir gerðu sig heimakomna, unnu skemmdir og stálu miklum verðmætum, meðal annars öllum fermingargjöfum dótturinnar á heimilinu.

Heimilisfólkið var í útlöndum en þegar það kom heim í nótt blasti við þeim ófögur sjón. Búið var að rútta til húsgögnum, sofa í rúmum, sígarettustubbar og tól til fíkniefnaneyslu lágu út um allt og búið var að stela miklum verðmætum eins og til dæmis öllum fermingargjöfum dóttur hjónanna í húsinu, flatskjám, tölvum, hljómflutningstækjum og fleiru.

Að sögn húsbóndans var fjölskyldan svo slegin við heimkomuna að hún treysti ser ekki til að sofa í húsinu í nótt. Hann segir að nú taki við allsherjar hreingerning hátt og lágt til að eyða óþægilegri tilfinningunni um nálægð hinna óboðnu gesta.

Hústökufólkið var hins vegar á bak og burt þegar fólkið kom heim og virðast nágrannar ekki hafa orðið varir við neinar mannaferðir við húsið, samkvæmt eftirgrennslan lögreglu.