Rúllað inn í hjólastól til blóðsýnatöku vegna ölvunar

Ökumaður, sem lögreglan á höfuðborgarsvæðinu stöðvaði í nótt, var svo drukkinn að lögreglumenn urðu að aka honum í hjólastól um ganga Landsspítalans, til að láta taka úr honum blóðsýni.

Þetta er með því svæsnasta sem lögreglumenn hafa séð en stutt er síðan að lögregla stöðvaði annan ökumann í borginni sem var svo loðmæltur af áfengisdrykkju að hann gat ekki gefið skýrslu.

Annars voru þrír ölvaðir ökumenn teknir úr umferð í nótt og var umræddur maður, sem er á þrítugsaldri, sýnu drukknastur. Hann var auk þess á stolnum bíl.

Annar var 17 ára piltur með bráðabirgðaökuréttindi sem mældist á ofsahraða eða tæplega 160 kílómetra hraða á Kringlumýrarbraut í Fossvogi og var hann auk þess með þrjá farþega í bílnum.

Sá þriðji var stöðvaður fyrir hraðakstur á Hellisheiði og mældist áfengismagn í blóði hans langt yfir mörkum. Hann hafði auk þess verið sviptur ökuréttindum áður, væntanlega fyrir ölvunarakstur.