Reykjanesbær getur ekki keypt meirihluta í HS

Heitar umræður urðu á opnum fundi um málefni Hitaveitu Suðurnesja í gærkvöldi. Forstjóri fyrirtækisins segir hugmyndir um að Reykjanesbær kaupi meirihluta í fyrirtækinu gangi ekki upp.

Málefni Hitaveitu Suðurnesja hafa verið mál málanna undanfarnar vikur á Suðurnesjum. Undirskriftalisti var settur í gang og óhætt er að segja að ekkert málefni hafi verið jafn tilfinningatengt í langan tíma í Reykjanesbæ.

Júlíus Jónsson, forstjóri Hitaveitunnar, sló það alveg út af borðinu á fundi sem haldinn var í gærkvöld að Reykjanesbær gæti keypti meirihluta í Hitaveitu Suðurnesja og sagðist jafnframt ekki hræðast einkaaðila í þessu máli.

Hann benti á að fyrirtæki með sjö milljarða í árlegar tekjur borgaði skki slíkan arð árlega um langt árabil meðan verið væri að greiða lán vegna kaupanna. Hann sagði vandamálið einfalt. Verðmat fyrirtækisins sem komið hafi fyrst í útboði á hlut ríkisins í félaginu og svo með með prútti aðila á eftir væri langt umfram það sem núverandi rekstur veitunnar stæði undir, jafnvel þótt reiknað væri með mikilli íbúafjölgun og virkjunum.

Árni Sigfússon, bæjarstjóri í Reykjanesbæ, sagði að bærinn hefði góð tök á málinu og að hann hræddist ekki framvinduna. Hitaveitan myndi styrkja og eflast.

Ásgeir Margeirsson, forstjóri Geysis Green Energy, var skýr í sínu máli og sagði markmið Geysis Green einföld. „Við mátum það afar mikilvægt fyrir það sem við værum að gera að hafa þann aðgang að þekkingu jarðhitaiðnaðarins á Íslandi til þess að geta nýtt hann í okkar tækifærum erlendis," sagði Ásgeir.