Tillaga um vígslu samkynhneigðra í hjónaband felld

Fulltrúar á prestastefnu sem fram fer á Húsavík felldu tillögu hóps presta og guðfræðinga á stefnunni um að farið yrði fram á það við Alþingi að breyta lögum þannig að prestar fengju heimild til vígja samkynhneigð pör í hjónaband. Tillagan var felld með nokkrum yfirburðum.

Hins vegar kom fram önnur tillaga á fundinum þar sem lagt er til að þeir prestar sem það kjósi verði vígslumenn samkynheigðra. Umræður um hana fara nú fram og verða greidd atkvæði um hana á eftir.

Ef hún verður felld verður rætt um það álit kenningarnefndar sem lá fyrir fundinum um að prestar fái heimild til frambúðar til að blessa samvist samkynhneigðra, en þeir hafa haft þann rétt í um ár.

Ekki liggur fyrir hvenær fundi presta um málið lýkur.