Mikil fjölgun kennslukvenna í framhaldskólum

Konum við kennslu í framhaldsskólum hefur fjölgað um 40 prósent á aðeins sex ára tímabili samkvæmt tölum Hagstofunnar. Þar kemur fram að konur hafi verið rúm 52 prósent kennara á síðasta skólaári en þær voru tæp 46 prósent skólaárið 2000-2001.

Körlum við kennslu í framhaldsskólum hefur hins vegar fjölgað um sjö prósent. Tölur Hagstofunnar leiða enn fremur í ljós að starfsmönnum við kennslu í framahaldskólunum hefur samanlagt fjölgað um rúm 20 prósent en það er í takt við fjölgun nemenda í skólunum. Haustið 2006 voru nærri 1900 kennarar í framhaldsskólunum en alls voru starfsmenn skólanna tæplega 2500.

Framhaldsskólar utan höfuðborgarsvæðisins hafa löngum haft hlutfallslega færri réttindakennara innan sinna vébanda en skólar á höfuðborgarsvæðinu. Í nóvember 2006 var staðan hins vegar orðin sú að hlutfallslega fleiri réttindakennarar störfuðu í skólum á landsbyggðinni en á höfuðborgarsvæðinu. Með réttindakennara er átt við þann starfsmann við kennslu sem hefur leyfisbréf frá menntamálaráðuneytinu til að kalla sig framhaldsskólakennara.

Alls höfðu um 76 prósent starfsmanna við kennslu í nóvember 2006 kennsluréttindi. Í nóvember 2005 var hlutfall réttindakennara hins vegar 78,7 prósent. Hlutfall réttindakennara á landinu öllu hefur því lækkað sem nemur 2,6 prósentustigum á milli þessara ára.

Í gögnum Hagstofunnar um starfsmenn í framhaldsskólum má sjá að undanfarin ár hefur starfsmönnunum í hlutastarfi fjölgað meira en starfsmönnum í fullu starfi. Starfsmönnum við kennslu sem starfa í minna en hálfu stöðugildi hefur þannig fjölgað um nærri þriðjung en á sama tíma hefur starfsmönnum sem eru í einu til einu og hálfu stöðugildi aðeins fjölgað um átta prósent.

Hagstofan segir að þetta skýri að einhverju leyti að réttindakennurum fækki hlutfallslega á milli síðustu ára þar sem mun fleiri starfsmenn séu réttindalausir í hópi starfsfólks í hlutastarfi en hinna sem eru í fullu starfi.