Kærir Ísland í dag vegna umfjöllunar um aðbúnað verkamanna

Fyrirtækið Húsaleiga ehf. fól í dag lögmanni sínum að leggja fram kæru á hendur forsvarsmönnum Íslands í dag vegna umfjöllunar þáttarins um aðbúnað erlendra verkamanna á Íslandi.

Í tilkynningu frá Húsaleigu segir að forsvarsmenn fyrirtækisins hafi ítrekað verið dregnir inn í afar neikvæða umræðu Íslands í dag um aðbúnað erlendra verkamanna og svo virðist sem dagskrárgerðarmenn þáttarins hafi lagt sig fram um að draga upp sem neikvæðasta mynd af forsvarsmanni fyrirtækisins og hafi staðreyndir verið látnar víkja fyrir því sem betur hafi hentað fyrir umfjöllunina.

Telji lögmaður Húsaleigu eru þessi vinnubrögð Íslands í dag óforsvaranleg og varði meðal annars við almenn hegningarlög nr. 19/1940 og lög um prentrétt nr. 57/1956.

„Dagskrárgerðarmenn Íslands í dag hafa í dag boðið forsvarsmönnum Húsaleigu ehf í viðtal, svo fyrirtækið geti skýrt sína afstöðu til þeirra ásakana sem komið hafa fram í þættinum. Þessu boði höfnuðu forsvarsmenn fyrirtækisins að vel ígrunduðu máli. Afstaða Húsaleigu ehf til "fréttaflutnings" Íslands í dag liggur ljós fyrir og kom m.a. fram í yfirlýsingu sem birtist í Morgunblaðinu í dag, 24. apríl 2007. Ennfremur væri óeðlilegt að forsvarsmenn Húsaleigu ehf þyrftu að verja hendur sínar í fjölmiðli sem fyrirtækið stendur í málaferlum við," segir að endingu í tilkynningu Húsaleigu.