Líkir hegðun Jóns Helga við handrukkun

Reynir Traustason, ábyrgðarmaður tímaritsins Ísafoldar, kallar Jón Helga Guðmundsson, aðaleiganda Kaupáss, ómerking sem hann hafi aldrei hitt í eigin persónu.

„Aðferðir hans við að koma höggi á fjölmiðil eru í ætt við athæfi handrukkara sem skeyta hvorki um reglur né lög í samfélaginu. Í því ljósi fagna ég yfirlýsingu Blaðamannafélags Íslands gegn vinnubrögðum Kaupáss. Jón Helgi sýndi félaginu þá fyrirlitningu að svara ekki spurningum þess," segir Reynir í yfirlýsingu sem hann hefur sent frá sér vegna fréttar sem birtist á Vísi fyrr í dag. Þar kallar Jón Helgi tímaritið Ísafold Baugsmiðil og harmar ekki ef tímaritið leggst af.

„Jón Helgi tók tímaritið Ísafold úr sölu sama dag og því hefti sem var með grein um mansal tengt Goldfinger birtist. Í þeirri grein var birt mynd af Gunnari Birgissyni bæjarstjóra í Kópavogi ásamt tveimur konum á Goldfinger. Jón Helgi er greinilega ekki maður sannleikans eins og sjá má af því að hann getur ekki viðurkennt að hafa tekið tímaritið úr sölu vegna félaga síns og velgjörðamanns í Kópavogi," segir Reynir.

„Hið undarlega við yfirlýsingar kaupmannsins er að framkvæmdastjóri Kaupáss og undirmaður Jóns Helga, Eysteinn Helgason, hafði samband við Jón Trausta Reynisson, ritstjóra Ísafoldar, í gær og virtist vilja friðmælast vegna sölubannsins. Jón Helgi aftur á móti stígur nú fram með grímulaust ofbeldi sitt og niðurlægir undirmann sinn. Aumt yfirklór hans bendir til þess að hann verðskuldi að hafa tapað því mikla fé á verslunarrekstri sem raun ber vitni," segir Reynir ennfremur.

Í niðurlagi yfirlýsingar sinnar segir Reynir að vegna ummæla Jóns Helga um að Ísafold sé Baugsmiðill sé rétt að taka fram að eigendur Baugs hafi aldrei reynt að hafa áhrif á ritstjórnarstefnu blaðisins eða einstök efnistök, þvert á það sem blasi við hjá Kaupásmönnum. Það sé rétt að almenningur sé upplýstur um framgöngu Jóns Helga Guðmundssonar.