Liggur þungt haldinn eftir bílveltu

Annar mannanna tveggja sem lentu í bílveltu á Suðurlandsvegi í morgun liggur þungt haldinn á Landspítalanum. Að sögn vakthafandi læknis eru áverkar hans taldir alvarlegir.

Maðurinn, sem er á fimmtugsaldri, gekkst undir skurðaðgerði skömmu eftir hádegi í dag. Hinn maðurinn, sem einnig er á fimmtugsaldri, virðist hafa sloppið betur að sögn vakthafandi læknis. Fylgst verður með líðan hans í dag.

Mennirnir slösuðust þegar jeppi sem þeir voru í fór útaf veginum á Suðurlandsvegi til móts við skálabæi undir Eyjafjöllum um klukkan hálf níu í morgun. Samkvæmt upplýsingum frá lögreglunni á Hvolsvelli líltur út fyrir að ökumaður jeppans hafi misst bílinn út í vegkant með fyrrgreindum afleiðingum. Fór hann að minnsta kosti tvær veltur áður en hann lenti á hjólunum.

Vegfarandi sem kom að slysinu gerði lögreglunni viðvart. Nota þurfti klippur til að ná mönnunum út en bíllinn er gjörónýtur að sögn lögreglu. Mennirnir voru síðan fluttur af slysstað með þyrlu Landhelgisgæslunnar.