Tóm hamingja að loðnuveiðar hefjast í haust segir LÍÚ

"Við teljum það tóma hamingju að loðnuveiðar hefjast í haust og það var mjög jákvætt að Hafrannsóknarstofnun náði að mæla loðnuna í fyrrahaust en þessar tölur um kvótann nú byggjast á þeirri mælingu," segir Friðrik Arngrímsson framkvæmdastjóri LÍÚ í samtali við Vísi. Eins og fram hefur komið á Vísi er búið að tilkynna um 145.000 tonna upphafskvóta til Íslendinga.

Friðrik bendir á að þetta sé ekki endanlegur kvóti fyrir komandi vertíð og að loðnan verði mæld aftur í haust og eftir áramót. Upphafskvótinn í haust var ákveðinn 205.000 tonn og hlutur Íslendinga er 145.000 tonn.

Kvóti vertíðarinnar í heild er ákveðinn 308.000 tonn og gæti breyst eftir fyrrgreindar mælingar. Viðbótin, 103.000 tonn, kemur öll í hlut Íslendinga því Norðmenn og Færeyingar fá allan sinn hlut af kvótanum, 60.000 tonn, strax samkvæmt samningum.

"Við vonum auðvitað að kvótinn muni aukast eftir því sem líður á vertíðina en það hefur alltaf verið mikil óvissa í kringum loðnuna enda drepst megnið af henni við þriggja ára aldurinn eftir hrygningu," segir Friðrik.