Stal mat úr Nóatúni fyrir 8000 krónur

Karlmaður á fertugsaldri hefur verið ákærður fyrir að stela matarvörum úr versluninni Nóatúni í Nóatúni 17 fyrir tæpar 8000 krónur. Hann gæti átt von á allt að sex ára fangelsisdómi, samkvæmt hegningalögum.

Bjarni Friðrik Jóhannesson, rekstrarstjóri Nóatúns verslananna, segir að búðarhnupl sé ekki að aukast en sé skuggahlið sem hafi alltaf fylgt verslunarrekstri. Hann segir ómögulegt að segja til um hversu margir gerist sekir um búðarhnupl á hverju ári en þeir sem gerist sekir um slík brot komi úr öllum þjóðfélagshópum.

Bjarni getur ekki gefið eiginlega skýringu á því hvers vegna þessi brot séu framin. „Þeir sem fara út í svona hluti hafa greinilega þörf fyrir það, sama hvort það er af fjárhagsástæðum eða einhverjum öðrum," segir hann. Bjarni Friðrik þvertekur fyrir að ástæður búðarhnupls megi rekja til þess hve hátt matarverð er.