Bráðabirgðaloðnukvóti verður 205 þúsund tonn

Sjávarútvegsráðuneytið hefur ákveðið að bráðabirgðakvóti fyrir komandi loðnuvertíð verði 205 þúsund tonn og þar af koma 145 þúsund tonn í hlut íslenskra loðnuskipa samkvæmt samningum um nýtingu loðnustofnsins.

Fram kemur í tilkynningu frá sjávarútvegsráðuneytinu að við þessa ákvörðun sé miðað að heildarkvóti komandi vertíðar, sem hefst þann 1. nóvember, verði 308 þúsund tonn og gangi það eftir eykst heildarkvóti íslensku loðnuskipannna rétt um 100 þúsund tonn frá fyrri vertíð.

Ráðuneytið bendir hins vegar á að loðnurannsóknir Hafrannsóknastofnunarinnar á hausti komandi gætu leitt til breytinga á leyfilegu heildarmagni. Það er hins vegar af sem áður var þegar meðalloðnuvertíð var upp á 700-800 þúsund tonn.