Fórnarlamb árásar fær engar bætur

Héraðsdómur Reykjavíkur sýknaði í dag íslenska ríkið af skaðabótakröfum hjúkrunarfræðings á geðdeild. Hjúkrunarfræðingurinn varð fyrir árás sjúklings þegar hún var í ferð með sjö öðrum starfsmönnum og 25 geðfötluðum sjúklingum á Landspítala í júní 1997.

Í stefnu kemur fram að konan hafi lent illilega á bakinu og sitjanda og handleggir og fótleggir slengst utan í sæti í rútunni. Jafnframt hefði hún fengið höfuðhögg. Skaðabótakrafa hjúkrunarfræðingsins var byggð á því að skipulagning ferðarinnar hefði verið verulega ábótavant og engar verklagsreglur verið til um hana. Einnig að hjúkrunarframkvæmdastjóri sem var með í för og annar hjúkrunarfræðingur hafi ekki sinnt skyldum sínum í ferðinni.

„Þá verður að telja óvarlegt af stefnanda að nálgast sjúklinginn með þeim hætti sem hún gerði," segir dómurinn og kemst að þeirri niðurstöðu að vinnuveitandi konunnar geti ekki borið ábyrgð á þeim skaða sem hún telur sig hafa orðið fyrir.