Mikilvægt að tryggja stöðu íslenskunnar í stjórnarskrá

Töluverð umræða hefur verið um þær hugmyndir sem Ágúst Ólafur Ágústsson, varaformaður Samfylkingarinnar, viðraði í grein í Morgunblaðinu á dögunum. Hann vildi skoða hvort gera ætti stjórnsýsluna tvítyngda til þess að auðvelda erlendum fyrirtækjum að kom sér fyrir hér á landi. Þá lýsti Sigurjón Árnason, bankastjóri Landsbankans, því yfir í viðtali að það kynni að reynast óhjákvæmilegt fyrir íslensk útrásarfyrirtæki að taka upp ensku sem vinnumál í höfuðstöðvum sínum.

Styrkja verði íslenskuna í sessi

Þorgerði Katrínu Gunnarsdóttur menntamálaráðherra hugnast þessar hugmyndir ekki og telur þvert á móti að styrkja þurfi íslenskuna í sessi. „Styrkleiki okkar í alþjóðasamfélaginu er íslenskan. Hún tengir okkur saman í öllu sem við tökum okkur fyrir hendur," sagði Þorgerður Katrín í samtali við Vísi.

Hún segist skilja að íslensk fyrirtæki í útrás þurfi í auknum mæli að nota erlend tungumál en það sé ekki þar með sagt að það megi varpa íslenskunni fyrir róða. Forystumenn í viðskiptalífinu verði að átta sig á því að það verði fremur að efla íslenskuna.

Þorgerður Katrín segir enn fremur að hún telji mikilvægt að taka hið táknræna skref, að tryggja stöðu íslenskunnar í stjórnarskrá Íslands. „Að mínu mati er það ein mikilvægasta breytingin á stjórnarskránni og ég tel að stjórnarskrárnefnd eigi að leggja áherslu á þetta í áframhaldandi vinnu sinni," segir Þorgerður Katrín.

Ekki bara frasi að lykilinn að samfélaginu sé í gegnum móðurmálið

Menntamálaráðuneytið hefur á þessu ári veitt samtals 200 milljónir króna til íslenskukennslu fyrir útlendinga, meðal annars til þess að bregðast við vaxandi fjölda þeirra á vinnumarkaði. Þorgerður Katrín segir aðspurð að engar endanlegar ákvárðanir hafi verið teknar um hvort íslenskukennsla verði áfram styrkt á næsta ári en stjórnvöld séu með puttann á púlsinum.

 „Ég tel jákvætt að fyrirtæki leggi metnað í að mennta starfsfólk sitt og við eigum að bjóða upp á íslenskukennslu," segir Þorgerður Katrín. „Það er ekki bara frasi að lykillinn að samfélaginu sé í gegnum móðurmálið. Ég tel að það séu eðlilegar kröfur að fólk sem hingað kemur til að setjast að læri tungumálið svo það komist inn í samfélagið," segir Þorgerður Katrín.