Bílar fuku víða útaf og rýma þurfti hús á Vestfjörðum

Skjólborð af vörubíl fauk framan á tvo bíla á Reykjanesbraut og rúta með um þrjátíu unglinga innanborðs fauk út af Suðurlandsvegi. Í Bolungarvík voru hús rýmd vegna snjóflóðahættu.

Bæta fór í veðrið um tíu leytið í morgun en á sama tíma barst lögreglunni á höfuðborgarsvæðinu tilkynning um að bíll hefði fokið út af rétt norðan við Grundarhverfið á Kjalarnesi. Miklar vindhviður voru einnig undir Hafnarfjalli í morgun en þar fuku tveir bílar út af. Engin alvarleg slys urðu á fólki.

Lögreglan lokaði Suðurlandsvegi á tólfta tímanum eftir að fjöldi ökumanna hafði lent í vandræðum við Sandskeið og á Hellisheiði. Skyggni og færð voru með versta móti og voru björgunarsveitarmenn kallaðir út til að aðstoða ökumenn sem misst höfðu bíla sína út af. Ökumenn sem leið áttu um Holtavörðuheiði þurftu sumir hverjir einnig að kalla á aðstoð.

Lögreglu bárust tilkynningar um nokkur óhöpp við Sandskeið og þar í kring en vindhraði fór upp í 29 metra á sekúndu þegar verst lét. Suðurlandsvegur var opnaður aftur um klukkan hálf tvö eftir að veðrið tók að lægja.

Skjólborð af vörubíl fauk framan á tvo bíla á Reykjanesbraut á öðrum tímanum. Farmur sem verið var að flytja fauk út um allt og talsverðar tafir urðu á umferð vegna óhappsins.

Fyrir hádegi fauk rúta með um þrjátíu erlendum ungmennum innanborðs út af Suðurlandsvegi vestan Markarfljóts. Þar slasaðist þó enginn.

Björgunarsveitir á Snæfellsnesi voru kallaðar út í morgun vegna óveðurs í Snæfellsbæ. Þar fuku þakplötur af nýbyggingu í Ólafsvík og flotbryggja losnaði frá höfninni á Rifi og fór af stað en tíu bátar voru fastir við hana.

Veðrið tók að ganga niður á Suður- og Vesturlandi síðdegis. Nokkuð bætti hins vegar í rigningu og þyngdist færð við það aftur á Hellisheiði.

Gert er ráð fyrir að bæta taki í vind norðan- og austanlands með kvöldinu en þar má búast við rigningu og hviðukenndu veðri.

Rýma þurfti fjögur hús við Traðarland og Dísarland í Bolungarvík vegna snjóflóðahættu, en snjóflóðahætta er einnig á hesthúsasvæðinu í Hnífsdal. Þá er viðbúnaðarstig vegna snjóflóðahættu við sorpbrennslu Funa í Engidal í Skutulsfirði. Varað er við snjóflóðahættu í Óshlíð en þó enn er opið þar fyrir umferð.

Veginum um Súðavíkurhlíð og Kirkjubólshlíð á milli Ísafjarðar og Súðavíkur var lokað í dag eftir að tvö snjóflóð féllu þar á tólfta tímanum og hefur hann ekki verið opnaður aftur.

Varðskip Landhelgisgæslunnar nú á leið til Reykjavíkur með Sólborgu RE-270, 115 tonna dragnótarbát, í togi. Báturinn varð vélarvana á Sandvík við Reykjanes um tvöleytið í dag. Fimm manns eru í áhöfn en ekki er búist við að komið verði til Reykjavíkur fyrr en seint í kvöld.