Carew eftirsóttur

Norski framherjinn John Carew hjá Lyon hefur nóg að gera þessa dagana ef marka má frétt norska dagblaðsins VG, en í samtali við blaðið í dag segist framherjinn þegar hafa neitað tilboðum frá tíu knattspyrnufélögum.

Carew sýndi það í Meistaradeildinni í vetur að hann er ekki dauður úr öllum æðum, en hann hefur þó ekki skorað nema eitt mark fyrir Lyon í deildinni. Carew er 27 ára gamall og gekk í raðir Lyon frá tyrkneska liðinu Besiktas árið 2005.

Umboðsmaður Carew segir að flest þeirra tilboða sem komið hafi í leikmanninn miði við stuttan samning, en segir leikmanninn alveg tilbúinn að vera áfram hjá Lyon ef ekkert bitastætt komi upp á borðið. Vitað er að þýska liðið Werder Bremen hefur sýnt honum áhuga og þá er því haldið fram að lið á Spáni og á Englandi hafi einnig gert honum tilboð.