Ekki ástæða til að endurskoða veru friðargæsluliða í Afganistan

Ekki er ástæða til að endurskoða veru íslenskra friðargæsluliða í Afganistan að mati Ingibjargar Sólrúnar Gísladóttur, utanríkisráðherra. Þetta kom fram í fyrirspurnartíma á Alþingi í dag.

Steingrímur J. Sigfússon, formaður Vinstri grænna, spurði ráðherra hvort þess væri að vænta að íslenskir friðargæsluliðar verði kvaddir heim frá Afganista. Vísaði Steingrímur til nýrra laga um íslensku friðargæsluna sem kveða á um að hún eigi einungis að starfa undir borgarlegum og mannúðlegum merkjum. Þá spurði Steingrímur þess hvort ráðherra telji að þáttaka íslenskra friðargæsluliða í verkefnum á vegum Nató sé samrýmanlegur lögunum um íslensku friðargæsluna.

Í svari Ingibjargar Sólrúnar Gísladóttur, utanríkisráðherra, kom fram að nú séu 15 íslenskir friðargæsluliðar starfandi í Afganistan. Tíu starfi við rekstur flugvallarins í Kabúl og hinir að öðrum borgarlegum verkefnum. Taldi ráðherra þá starfa innan ramma laganna um íslensku friðargæsluna og því væri ekki ástæða til að endurskoða veru þeirra þar. Staðan verði hins vegar endurmetin ef aðstæður á svæðinu breytast.

Ingibjörg benti ennfremur á að hún telji þátttöku íslensku friðargæslunnar í verkefnum á vegum Nató samrýmast lögum. Gæsluliðarnir geti starfað innan hernaðarskipulags og verið með tign en þeir starfa ekki við að koma á frið heldur að reyna varðveita hann.