Eyjólfur: Sækjum upp kantana

Eyjólfur Sverrisson landsliðsþjálfari segir að íslenska liðið muni leggja áherslu á að sækja upp kantana þegar það tekur á móti Lettum í undankeppni EM á morgun. Hann vill ólmur ná sigri í síðasta heimaleik liðsins í keppninni.

"Æfingarnar hafa gengið mjög vel þó hafi verið nokkuð hvasst. Ástandið á hópnum er nokkuð gott en það er smá vandamál með Veigar Pál sem við eigum eftir að skoða með læknunum," sagði Eyjólfur á blaðamannafundi á Loftleiðum eftir hádegið.

Hann ætlar ekki að tilkynna 18 manna hóp sinn eða byrjunarlið fyrr en í fyrramálið.

"Þessi leikur leggst mjög vel í mig og mér finnst mikilvægt að halda því leikskipulagi og anda sem verið hefur í síðustu leikjum. Þetta er síðasti heimaleikurinn okkar í þessari keppni og við erum staðráðnir í því að standa okkur vel og kveðja með stæl," sagði Eyjólfur.

Hann á ekki von á því að fjarvera Hermanns Hreiðarssonar skapi óöryggi í varnarleik íslenska liðsins. "Það kemur bara maður í manns stað," sagði Eyjólfur og segist ekki vera búinn að ákveða hver leysir Hermann af hólmi. "Það gæti vel verið að það yrði bara hægrifótarmaður og hreinn varnarmaður. Ég á bara eftir að skoða það."

Eyjólfur segist ætla að sækja upp kantana á lið Letta á morgun. "Ég sá Lettana spila 4-4-2 á móti Spánverjum og þar voru þeir inni í leiknum allan tímann, ógnuðu Spánverjum og voru mjög góðir. Við vorum allt of opnir á móti þeim í fyrri leiknum og þar nýttu þeir sín færi og við ekki. Það var munurinn. Við vorum allt of gráðugir á móti þeim úti og verðum að vera þolinmóðari á morgun."

"Lettarnir eru dáltíð líkir Norður-Írunum að mörgu leiti og ég reikna með hörkuleik. Við munum sækja upp kantana á þá og það gæti komið til greina að liðsuppstillingin taki eitthvað mið af því," sagði Eyjólfur.

"Þeirra helsti styrkleiki er að þeir eru með fljóta menn og geta sótt hratt. Þetta er gott lið og ég vara við því að menn séu með neinn hroka út í þetta lið því þeir unnu okkur jú 4-0 í fyrri leiknum. Við erum hinsvegar ekkert hræddir við þá og ætlum ekki að taka á þeim með neinum vettlingatökum."