Innlent

Alcan í Straumsvík heldur öllu opnu um orkukaup frá Landsvirkjun

Alcan í Straumsvík vill halda opnum möguleika næstu þrjá mánuði um orkukaup frá nýjum virkjunum í Þjórsá, þrátt fyrir niðurstöðu kosninganna í Hafnarfirði.

Alcan á Íslandi hefur komið þeim boðum til Landsvirkjunar að áður gert samkomulag um orkukaup vegna stækkunar í Straumsvík haldi gildi sínu til 30. júní, en á meðan ræðir Landsvirkjun ekki við aðra um nýtingu orkunnar. Undirbúningur virkjana í neðri hluta Þjórsár heldur áfram á fullu af hálfu bæði Landsvirkjunar og Skeiða- og Gnúpverjahrepps, en þar eru virkjanirnar nú í lokaferli aðalskipulags.

Með niðurstöðu kosningarinnar í Hafnarfirði um síðustu helgi, þar sem stækkun álversins var felld, mætti ætla að þar með gæfi Alcan frá sér fyrirliggjandi viljayfirlýsingu um orkukaup við Landsvirkjun. Það hefur hins vegar ekki gerst heldur hefur Alcan þvert á móti, samkvæmt heimildum Stöðvar 2, komið þeim boðum til Landsvirkjunar að það vilji að samkomulagið gildi til 30. júní, eins og ákvæði þess bjóði upp á. Tvennt er talið vaka fyrir Alcan með þessu. Annarsvegar vilji fyrirtækið fá ráðrúm til að meta hvaða möguleika fyrirtækið hafi í stöðunni og hins vegar vilji það halda öðrum keppinautum frá svo lengi sem kostur er, en Landsvirkjun hefur lýst því yfir að það muni ekki ræða við aðra orkukaupendur meðan viljayfirlýsingin er í gildi. Þá breytir álverskosningin í Hafnarfirði heldur engu um undirbúning virkjananna þriggja í Þjórsá; Urriðafoss, Hvamms, og Holtavirkjunar. Landsvirkjun hyggst innan skamms ganga til samninga um hönnun þeirra, en þrjár íslenskar verkfræðistofur urðu hlutskarpastar í útboði í síðasta mánuði; VST, VGK-Hönnun og Rafteikning. Jafnframt heldur Landsvirkjun áfram samningaviðræðum við landeigendur við Þjórsá. Sveitarstjórn Skeiða- og Gnúpverjahrepps hyggst heldur ekki stöðva skipulagsferlið en þar er þessa dagana verið að fara yfir milli 80 og 90 athugasemdir sem bárust, samkvæmt upplýsingum oddvita. Hann segir, eins og Landsvirkjun, að alltaf hafi legið fyrir að virkjanirnar væri ekki háðar neinum ákveðnum kaupanda að orkunni.




Fleiri fréttir

Sjá meira


×