Hvalshræ í fjörunni við golfvöllinn í Grindavík

Hvalur, sem líklega er hrefna, hefur rekið upp í fjöru skammt frá golfvellinum í Grindavík. Að því er fram kemur á vef Víkurfrétta er talið líklegt að hvalurinn hafi legið í fjörunni í nokkurn tíma enda hefur hann rotnað töluvert.

Þykir það merkilegt hversu langt upp á land hræinu hefur skolað og er því líklegt að það hafi gerst í stórbrimi fyrir fáeinum vikum. Ekki er hægt að segja til um hvað orðið hefur hvalnum að aldurtila. Hvalrekar þóttu mikil búbót hér í eina tíð og voru nýttir til fæðu en ólíklegt verður að teljast að nokkur leggi sér hann til munns annar en dýr þar sem hann hefur rotnað verulega.