Þörf á skýrari reglum um farbannsúrskurði

Stefán Eiríksson, lögreglustjóri á höfuðborgarsvæðinu, segir að menn sem séu í farbanni þurfi að tilkynna sig með reglulegum hætti hjá lögreglu.

Tveir karlmenn, sem grunaðir eru um aðild að nauðgun á Selfossi hafa rofið farbann og flúið land. Sýslumaðurinn á Selfossi og lögreglustjórinn á Suðurnesjum segja að erfitt sé að framfylgja farbannsúrskurðum þegar menn frá Schengen-svæðinu eiga í hlut.

„Oft er gerð krafa um að viðkomandi tilkynni sig daglega. Þá er send tilkynning um farbannið til þeirra sem vinna við eftirlit með fólki á millilandaflugvöllum og til þeirra sem hafa eftirlit með skipum, segir Stefán Eiríksson í svari til Vísis.

„Að fenginni reynslu er ástæða til að endurskoða heimildir lögreglu um form og fyrirkomulag þeirra skilyrða sem lögregla getur sett þeim sem úrskurðaður hefur verið í farbann. Nauðsynlegt er að kveða skýrar á um þetta í lagaákvæðinu," segir Stefán enn fremur.

Brynjar Níelsson hæstaréttarlögmaður tekur undir með Stefáni. Hann telur óvíst að Alþingi þurfi að breyta lögum til þessa. „Í 109. og 110 grein um meðferð opinberra mála er kveðið á um tryggingu sem er hægt að setja vegna farbanns. Hins vegar væri æskilegt ef settar yrðu skýrari reglur um farbannsúrskurði," segir Brynjar.

Stefán segir ekki víst að rafrænt eftirlit bæti einhverju við þær ráðstafanir sem nú þegar séu gerðar. „Eðlilegt er þó að skoða þennan möguleika nánar en þá í tengslum við rafrænt eftirlit sem almennt úrræði í refsivörslukerfinu. Farbann á að duga ef unnt er að setja raunhæf og skýr skilyrði sem tryggja að unnt sé að fylgjast með viðkomandi daglega, tvisvar á dag og svo framvegis. Allt fer það eftir tilefni," segir Stefán.

Stefán bendir jafnframt á að sá sem brýtur gegn farbanni hafi gerst brotlegur við lög og verði í kjölfarið eftirlýstur í gegnum alþjóðleg samskipta- og upplýsingakerfi lögreglu. Það er Schengen upplýsingakerfið sem flest ríki Evrópu tengist svo og í gegnum samskiptakerfi Interpol. „Það gerir það að verkum að viðkomandi á það yfir höfði sér að vera handtekinn hvar sem til hans næst í heiminum og í kjölfarið á hann yfir höfði sér framsal hingað til lands," segir Stefán.