Barnarsáttmáli SÞ 18 ára í dag

Bandaríkin og Sómalía eru einu ríkin sem ekki hafa fullgilt Barnasáttmála Sameinuðu þjóðanna en 18 ár eru í dag frá því að samningurinn var lagður fyrir allsherjarþing samtakanna.

Í tilkynningu frá UNICEF á Íslandi er bent á að nú vaxi úr grasi fyrsta kynslóð barna sem notið hafi verndar Barnasáttmálans alla sína ævi og verður þeim tímamótum fagnað víða um heim, þar á meðal í Norræna húsinu. Þar fer fram málþing frá klukkan 14-16.30 þar sem meðal annars Lucy Smith, fulltrúi hjá alþjóðlegu barnaréttarnefndinni, talar um sáttmálann.

Ísland fullgilti sáttmálann fyrir um 15 árum en samkvæmt honum skuldbinda yfirvöld sig til að fræða almenning, ekki síst börn, um hann. Þá bendir UNICEF á að fyrir Alþingi liggi fyrir þingsályktunartillaga um lögfestingu Barnasáttmálans á Íslandi.

Alls hafa 191 ríki fullgilt sáttmálann en Bandaríkjamenn og Sómalar hafa ekki gert það þótt fulltrúar beggja ríkja hafi skrifað undir hann. Segir UNICEF að þetta þýði að 2,2 milljarðar barna njóti verndar og viðurkenningar á réttindum sínum.