Sprenging í fíkniefnaakstri á Selfossi

Ný lög er varða akstur undir áhrifum fíkniefna tóku gildi 1. júní 2006. Þar segir að hver sá sem neytt hafi fíkniefna, eða annarra ávanabindandi efna, sé ófær um að aka bifreið.

Á því tímabili hefur lögreglan á Selfossi handtekið 111 ökumenn í umdæminu grunaða um fíkniefnaakstur. 32 ökumenn voru gripnir í fyrra og það sem af er þessu ári eru þeir orðnir 79 talsins, eða næstum átta ökumenn á mánuði sé miðað við fyrstu tíu mánuði ársins. Á þessu ári hafa 54 þeirra verið ákærðir en hinir bíða ákæru.

Að sögn Þorgríms Óla Sigurðssonar, aðstoðaryfirlögregluþjóns hjá lögreglunni á Selfossi, hafa flestir ökumannanna neytt amfeta­míns og kannabisefna og auk þess hefur lögregla handtekið ökumenn sem sest hafa undir stýri á bíl eftir að hafa neytt kókaíns eða alsælu. Hann segir lögreglu leita í bíl viðkomandi sé hann grunaður um fíkniefnaakstur en óverulegt magn fíkniefna hafi fundist hingað til.

Þorgrímur segir ökumennina koma hvaðanæva að. „Þetta er bæði fólk héðan af svæðinu og í kring, en margir ökumannanna hafa verið að koma frá borginni skiljanlega,“ segir Þorgrímur. „Við tökum líka oft sama fólkið oftar en einu sinni.“

Öll fíkniefnaakstursmál sem koma inn á borð lögreglu eru tekin til ákærumeðferðar óháð magni sem finnst í blóði hins grunaða, ólíkt því sem gerist í ölvunaraksturstilfellum en þar ræður magn í blóði hvort ákært er eður ei.

Viðurlög við fíkniefnaakstri eru svipting ökuréttinda og sekt, sem fer eftir magninu sem finnst í blóði ákærða, sem og sakarkostnaður. Í því felst meðal annars að vinna blóðsýni vegna fíkniefna og getur slík rannsókn kostað frá 150 þúsund krónum og upp í 180 þúsund. Til samanburðar er kostnaðurinn við áfengispróf sjö þúsund krónur.

Dómar sem fallið hafa að undanförnu í Héraðsdómi Austurlands varða ökuleyfissviptingu allt frá þremur mánuðum upp í ár, og sektargreiðslum frá hundrað þúsund krónum upp í á þriðja hundrað þúsund króna.

Til samanburðar má geta þess að á síðasta ári hafði lögreglan á Selfossi afskipti af 121 ökumanni vegna ölvunaraksturs, en í ár þegar tæpir tveir mánuðir eru eftir af árinu, eru þeir orðnir 127 svo að þar virðist tilfellum fjölga einnig, óverulega þó.