Nærri þrjú þúsund hlýddu á Noruh Jones

Tæplega þrjú þúsund manns voru á tónleikum bandarísku jass og kántrýsöngkonunnar Noruh Jones sem haldnir voru í Laugardagshöllinni í gærkvöld.

Norah Jones hefur verið í tónleikaferð um alla Evrópu síðustu þrjá mánuði til að kynna þriðja plötu sína "Not too late". Platan kom út í byrjun árs og hefur vakið miklar vinsældir um allan heim. 2900 miðar voru seldir á tónleikana og náði söngdívan að hrífa tónleikagesti með sér.

Hún söng nær flest lögin á nýju plötunni sinni en tók einnig vinsælustu lögin á eldri plötunum. Þá tók hún þekkt lög meðal annars eftir Tom Waits.

Hljómsveitin The Handsome Band spilaði undir með dívunni og bandaríski trúbadorinn Emmy Dott Ward hitaði upp fyrir tónleikana. Hann er þekkt söngvaskáld í austurhluta Bandaríkjanna og góðvinur Noruh Jones. Þetta eru síðustu tónleikarnir hennar í þriggja mánaða tónleikatúr og snýr hún aftur til Bandaríkjanna á morgun.