Austurlensk áhrif hjá Hrefnu

Hrefna Rósa Sætran opnar nýjan veitingastað snemma í ágúst og kallar hann Fiskmarkaðinn. Hrefna var í kokkalandsliðinu og eftir skóla fór hún að vinna á Sjávarkjallaranum þar sem hún var orðin yfirkokkur.

„Ég fékk mjög góða reynslu á Sjávarkjallaranum en langaði svo að prófa þetta sjálf og ákvað að opna veitingastað. Við verðum mestmegnis með fiskmeti á matseðlinum en einnig verða kjöt- og grænmetisréttir í boði fyrir þá sem vilja," segir Hrefna sem hefur hrifist mikið af austurlenskri matargerð.

„Ég er yfir mig hrifin af austurlenskum mat og hef verið að prófa mig áfram. Á Fiskmarkaðnum munum við því bjóða upp á það besta frá Íslandi í bland við það besta frá Austurlöndum og held ég að það sé skemmtileg blanda. Austurlensk matargerð getur verið svolítið snúin því það þarf að læra svo vel inn á hráefnið áður en hægt er að nota það. Draumurinn er svo að kíkja til Asíu en það verður að bíða seinni tíma."

Fiskmarkaðurinn verður staðsettur í Aðalstræti 12, í gamla Ísafoldarhúsinu. „Þetta er allt að smella saman. Ég er komin með fjóra kokka með mér en okkur vantar þó ennþá matreiðslunema og fleira starfsfólk," sagði athafnakonan mikla sem hefur hlotið góðar viðtökur í matreiðsluheiminum hingað til og er því þessi nýi veitingastaður ansi spennandi.