Logi Ólafs kaupir sér afdrep í sveitinni

„Það má segja að það sé gamall draumur minn að verða bóndi. Nú er ég kominn hálfa leið,“ segir Logi Ólafsson, fyrrverandi landsliðsþjálfari og núverandi íþróttakennari og fótboltaskýrandi. Logi hefur keypt jörðina Arnarhól í Flóahreppi en eftir því sem fram kemur á vef Suðurlands er um að ræða 130 hektara lands auk bæjarstæðis. Uppsett verð voru 90 milljónir króna.

„Ég hef alltaf verið sveitamaður í mér og hef lengi verið að leita að svona stað,“ segir Logi en þó að ljóst sé að hann muni eyða miklum tíma á Arnarhóli er ekki ákveðið hvort hann muni flytja þangað með öllu. „Framhaldið er ekki alveg ákveðið nema það að ég ætla að eiga þessa jörð og gera eitthvað skemmtilegt.“

Á Arnarhóli verður glæsileg aðstaða til hestamennsku en Logi er og hefur lengi verið mikill hestaáhugamaður. Hann á þó ekki von á því að annars konar búskapur verði stundaður. „Það er allavega óhætt að fullyrða að þarna verði hestar,“ segir Logi.

Seljandinn að jörðinni er aldavinur Loga úr knattspyrnuheiminum, Kristinn Björnsson, sem eitt sinn þjálfaði Val í úrvalsdeildinni en einbeitir sér að nautgriparækt í dag. Hann hefur nú keypt jörð í Meðallandi í Skaftárhreppi. Logi segir það skemmtilega tilviljun að jörðin haldist áfram í eigu knattspyrnuþjálfara. „Þetta er sannkölluð þjálfarajörð.“