Æfir með meistaraflokki Vals að Hlíðarenda

„Mér finnst bara helvíta gaman í fótbolta og graslyktin er alltaf jafn góð,“ segir Ólafur Stefánsson, einn besti handknattleiksmaður Íslands og heims, en hann æfir um þessar mundir með meistaraflokki Vals í knattspyrnu.

Ólafur þótti bráðefnilegur á græna vellinum og var meðal annars kallaður „Óli Sóli“ á sínum yngri árum en hann lagði takkaskóna á hilluna um tvítugt. Hann hefur þó haldið tækninni vel við enda er oft hitað upp á handknattleiksæfingum í fótbolta. „Mér finnst bara ótrúlega gaman að koma á Hliðarenda og kynnast Valsstrákunum í knattspyrnunni,“ segir Ólafur sem hefur hampað ófáum titlum með meistaraflokki Vals í handknattleik á þessum slóðum.

Leikmaðurinn kvaðst ekki vera hræddur við að meiðast alvarlega á æfingum sem kynnu að setja strik í reikninginn hjá liði hans á Spáni, Ciudad Real. „Ég hef fengið að heyra slíkar vangaveltur síðastliðin fimmtán ár. Ef ég hefði alltaf hlustað á þær hefði ég ekki hreyft mig á sumrin.“ Ólafur lýsti því yfir í sjónvarpsviðtali fyrir nokkrum misserum að honum stæði til boða að leika knattspyrnu með úrvalsdeildarliði þegar hanknattleiksferlinum lyki. „Ég útiloka ekkert endurkomu á knattspyrnuvöllinn eftir tvö ár þegar ég hætti í handbolta.“

Og ef marka má orð Willums Þórs Þórssonar, þjálfara Vals, yrði Ólafur mikill liðsstyrkur fyrir sérhvert lið í úrvalsdeildinni. „„Hann hefur gert þetta undanfarin ár og nýtir sér þetta til að brjóta upp æfingarformið hjá sér.“ Willum segir strákanna ekki taka landsliðsmanninn neinum silkihönskum, á því hafi reyndar aldrei gerst þörf. „Hann er sannur keppnismaður og gefur ekki tommu eftir,“ segir Willum . „Hann er kominn til æfa þegar hann mætir og gerir rúmlega það sem er beðið um og oftast meira.

Og slíkt hugarfar er mjög mikilvægt fyrir unga leikmenn að sjá,“ bætir Willum við. „Og ég gæti haldið áfram að hlaða hann lofi því Ólafur er um margt mjög sérstakur. Í raun held ég að það sé alveg sama hvað hann tekur sér fyrir hendur, hann yrði alltaf góður í því.“ Að sögn Willums hefur Ólafur leikið frekar aftarlega á vellinum og bætir því við að margrómaður leiksskilningur hans í handknattleik skili sér vel á knattspyrnuvellinum. „Hugarfar hans skilur á milli feigs og ófeigs í þessu.“