Þingmenn úthluta peningum úr tómum sjóði

Þrátt fyrir að halli sé á rekstri fæðingaorlofssjóðs vilja allir stjórnmálaflokkarnir sem sæti eiga á Alþingi, nema Frjálslyndi flokkurinn, lengja fæðingarorlofið. Sjálfstæðisflokkurinn tilgreinir ekki, í sínum landsfundarályktunum, hve langt fæðingarorlofið eigi að vera, Samfylkingin, Framsóknarflokkur og Vinstri-grænir vilja lengja það úr níu mánuðum í eitt ár. Auk þess vilja Vinstri-grænir að foreldrar eigi, auk fæðingarorlofsins, kost á tveggja mánaða launuðu foreldraorlofi síðar.

Í fjáraukalögum fyrir árið 2007 er lagt er til að veitt verði 440 milljónum til Fæðingarorlofssjóðs vegna endurskoðaðrar áætlunar um útgjöld sjóðsins á árinu. Hækkunin er skýrð af þremur ástæðum. Í fyrsta lagi vegna hækkunar á mótframlagi í lífeyrissjóði um síðastliðin áramót. Í öðru lagi hafa fleiri farið í fæðingarorlof en áætlað var. Í þriðja lagi var reglum um greiðslur úr sjóðnum breytt á árinu í kjölfar álits umboðsmanns Alþingis sem hafði í för með sér meiri útgjöld en gert var ráð fyrir.

Kristján Þór Júlíusson, þingmaður Sjálfstæðisflokksins og varaformaður fjárlaganefndar, segir fæðingarorlofssjóð ekki vera á hausnum. „Það er í sjálfu sér ekkert óeðlilegt við það að stjórnmálaflokkarnir stefni á lengingu fæðingarorlofs þrátt fyrir að staða sjóðsins sé svona," segir Kristján Þór og bendir á að í stefnuyfirlýsingu ríkisstjórnarinnar sé stefnt að lengingu fæðingarorlofs. „Mér finnst fyllilega kominn tími til þess að menn fari að leggja mat á sjóðinn sem slíkan, hvernig hann er fjármagnaður, hvernig menn vilji að hann virki í framtíðinni og hvaða árangri hann hafi skilað hingað til," segir Kristján.