Gengið að tilboði Red Vulcan í Orkuveitu Filippseyja

Yfirvöld á Fillipseyjum ákváðu í morgun að taka tilboði hóps undir forystu filippseyska fyrirtækisins First Gen í 60 prósenta hlut í Orkuveitu Filippseyja, PNOC-EDC. Þetta kemur fram í netmiðlum á Filippseyjum.

Tilboðið hljóðar upp á 58,5 milljarða pesóa eða 84 milljarða króna og reyndist langhæst þeirra fimm tilboða sem bárust í hlutinn. Eins og fram hefur komið í fréttum stóð til að Reykjavik Energy Invest og Geysir Green Energy myndu taka þátt í kaupunum með First Gen en þar sem félögin töldu tilboð First Gen of hátt ákváðu þau að taka ekki þátt í tilboðinu. Því bauð First Gen í hlutinn ásamt tveimur hollenskum fyrirtækjum, Spalmare Holdings og Prime Terracota Holdings.

Fram kemur í frétt á inquirer.net á Filippseyjum að fyrirtækjahópurinn, sem gerði tilboðið í nafni Red Vulcan, fari eftir kaupin með meirihluta i Orkuveitu Filippseyja. Alls var um að ræða 40 prósenta hlut í orkuveitunni en honum fylgdi 60 prósent atkvæðisréttar hjá félaginu.

Hvorki Bjarni Ármannsson, stjórnarformaður REI, né Guðmundur Þórodssson, forstjóri REI, hafa viljað tjá sig um málið.